CENTRAL VISAYAS- Mipatigbabaw ang Police Regional Office 7 (PRO7) sa ilang makanunayong kahusayan sa serbisyo human nila nakab-ot ang No. 1 nga puwesto sa tibuok nasud batok sa 17 ka regional offices sa Pilipinas, base sa pinaka-ulahing resulta sa Unit Performance Evaluation Rating (UPER) para sa buwan sa Mayo 2025.
Base sa opisyal nga datos nga gipagawas sa Philippine National Police (PNP) niadtong Lunes, Hulyo 21, nakakuha og 82.534% performance score ang PRO7 nga nakapabilin sa tuktok sa rankings sukad pa sa Abril 2025.
Mipasalig si Police Brigadier General Redrico A. Maranan, regional director sa PRO7, nga ang ilang liderato magpadayon nga estratehiko ug nakatutok sa resulta.
Gidayeg usab sa opisyal ang propesyonalismo, disiplina, ug kakugi sa tanang personahe sa PRO7, ug iyang giawhag ang ubang rehiyonal nga yunit sa PNP nga sundon ang PRO7.
Ang UPER mao ang binuwan nga performance evaluation system sa PNP nga nagtan-aw sa daghang aspeto sa organisasyonal nga operasyon, lakipang disiplina ug internal policies,pagkontrol sa krimen ug implementasyon sa balaod, recruitment ug selection processes, personnel welfare ug morale, human resource management, pagpatuman sa command plans ug polisiya.
Nagpabilin nga lig-on ang imahe sa PRO7, ilabi na sa ilang agresibong kampanya batok sa kriminalidad.
Ang padayon nga liderato sa PRO7 sa performance rankings nagpamatuod sa kultura sa pagkamaayo, panaghiusa sa pagpangulo, ug aktibong pakiglambigit sa komunidad — hinungdan nga mas mitaas pa gyud ang pagsalig sa publiko sa kapulisan sa tibuok Central Visayas.
