CEBU – Hilabihan kasakit ug kasubo ang nabati sa Inahan sa usa ka 15-anyos nga Dalagita kung diin ang biktima wala nay kinabuhi ug hubo nang nakit-an nga adunay mga samad sa kalawasan sa Brgy. Gairan sa Syudad sa Bogo Sugbo.
Matud pa ni Mavelle Sinadjan, inahan sa Biktima nga sa wala paman nahitabu ang insidente nananghid iyahang anak nga molakaw sa Medellin kay mi tambong ug birthday party kauban ang uyab niini, apan nakurat nalang siya nga kadlawon nalang wala pa nauli iyahang anak, hinungdan nga gisulayan kini niya pag kontact,apan wala kini ma kontact, butang nga nakabalaka kanila.
Nanghinaot kini nga unta mahatagan ug hustisya ang kamatayon sa iyahang anak, ilabi nga dili tawhanon ang kamatayon niini, iyaha pang gitino nga bootan, friendly, jolly, talented ug daghang pangandoy ang iyahang anak, butang nga dili na niini mahimo gumikan sa walay kaluoy nga mga tawo nga nagpatay ug nagpasipala niini.
Samtang sa pikas bahin gimando sa labing taas nga opisyal sa Police Regional Office sa Central Visayas (PRO-7) ang paspas nga imbestigasyon sa pagpatay sa tinun-an.
Kini nga direktiba giluwat ni Police Brigadier General Roderick Augustus Alba karung adlawa Lunes, Nobiyembre 14, nga gitumong ngadto sa Cebu Police Provincial Office (CPPO) ug sa hepe sa kapolisan ug mga imbestigador sa Bogo City Police Station.
Sa kasamtangan ang kapulisan sa Bogo City uban sa PNP SOCO padayon pa nga nag imbistigar sa maong krimen arun sa pagsuta kun ang biktima gilugos ba sa wala pa patya ug ingun man sa pagsuta sa wala pa mailhing kriminal, ug ipaubos sa post-mortem examination aron masuta ang hinungdan sa iyang kamatayon.
Hugot nga gipahimangnoan sa Opisyal ang katawhan, ilabi na ang mga minors nga magbinantayun ug mag inampingun sa ilahang mga kaugalingun.
