CENTRAL VISAYAS-Gipaambit sa Election Assistant sa Comelec Cebu City North District ang kahapsay ug kamalinawon sa pag-filing sa mga COCs sa mga kandidato sa umaabot nga BSK elections 2023 sa probinsya sa Sugbo.
Sa pakighinabi sa Bombo Radyo Cebu kang Omar Shariff Mamalinta, Election Assistant Comelec Cebu City North District, niingon kini nga sugod sa first day hantod sa kasamtangan, walay natala nga kagubot ug kaguliyang lakip na sa laing bahin sa Central Visayas.
Sa laing bahin, sa pag-implementar sa gun ban alang sa seguridad sa nasud ug katawhan sa umaabot nga eleksyon diin hapsay sab ang ilahang mga operasyon sugod sa unang pagpatuman niini.
Nanghinaot usab si Mamalinta nga magpabiling malinawon ug magmalampuson ang dagan sa umaabot nga piniliay hangtud nga mahuman ang naasoy nga kalihukan.
