PROVINCE OF CEBU-Gikatakdang makigtagbo si Cebu Provincial Governor Gwendolyn Garcia kauban ang tanang mga mayor sa lalawigan sa Sugbo karong Oktubre 25 aron ma-review ang listahan sa mga dapit sa Sugbo diin mabatonan ang mas baratong bugas gikan sa National Food Authority.
Nagkanayon ang Gobernadora nga mogasto ang probinsyal nga kagamhanan sa Sugbo og P100 milyones aron ipalit og bugas gikan sa NFA alang sa pag-apod-apod ngadto sa labing kabos nga katawhan nga giila sa Department of Social Welfare and Development (DSWD).
Si Garcia nihangyo nga ang mga opisyal sa NFA sa kaulohan mo-supply og igong bugas sa Rehiyon VII aron ibaligya sa mga kabus nga katawhan sa lokalidad.
Nanawagan siya sa NFA nga suportahan ang probinsya sa Sugbo sa ilang paningkamot nga maminusan ang kakabus nga nasinati sa lokalidad.
Ang bugas ibaligya sa tag P20 matag kilo ngadto sa mga nanginahanglan nga mas barato pa sa unang gikasabotan nga presyo nga P25.
Matod pa ni Garcia nga kini subay sa tumong sa presidente nga makabaligya og baratong bugas.
Ang gobernador namahayag nga bisan og adunay mga commercial rice nga anaa sa mas barato nga presyo sa gustong mopalit og bugas, aduna gihapoy limit nga 10 kilos matag pamilya matag semana alang sa pag-apod-apod sa mga nanginahanglan.
