Gisugdan na pagbalik ang pagpadayon sa paghimo sa Pulangbato Bridge o reinforced deck girder bridge, diin aduna pa kini gipahigayon nga groundbreaking ceremony karong adlawa, Miyerkules, Agosto 20, 2025.
Ang reinforced deck girder bridge anaa kini nahimutang sa Sityo Candarong, Barangay Pulangbato, Cebu City, diin aduna kini 27.9 M nga kantdad ang maong proyekto nga gikontrata sa SJ Bonifacio Builders, isip maoy mopuli sa taytayan nga naguba sa Bagyong Odette niadtong 2021.
Ang proyekto nahunongan sa pagtrabaho human ang unang kontraktor niini napakyas sa ilang katungdanan, nga nag-aghat sa Cebu City Council sa pagdeklarar og state of emergency niadtong Abril aron paspasan ang pagpdayon og tukod niini.
Kahinomdoman nga nisaad si Cebu City Mayor Nestor Archival nga ang pagpahuman sa maong taytayan, humanon niya sa dili pa matapos o dili pa molabang sa laing tuig.
Busa, ang target nga panahon sa pagpahuman sa maong taytayan anaa lamang sulod sa unom ka buwan, aron matagaan na og seguridad luyo sa risgo nga gi-atubang sa mga residente sa usa ka peligroso nga footbridge nga ginama sa kawayan.
Alang kang Archival, ang maong proyekto importante kay makapalig-on kini sa koneksyon, pagsiguro sa mas luwas nga agianan, ug magdala ug malungtarong pag-uswag sa komunidad.
