CEBU – Nawagtangan na ug paglaum nga makab-ot ang tinguha nga mahimong usa sa mga topnotcher sa Civil Engineering Licensure Board Examination gumikan sa kalisod sa eksaminasyon.
Kini ang pagtuo ni Lou Mervin Tristan Mahilum, ang nag-top 1 sa nahisgutang eksaminasyon.
Gibutyag ni Engineer Mahilum nga sa dihang nag-review pa kini giingong ‘aim’ gayud niini nga malakip sa mga topnotcher apan sa dihang naabot ang eksaminasyon, na-usab ang panglantaw niini apan iyahang giklaro nga kumpyansa gayud kini nga makapasar.
Gipaambit ni Mahilum nga sa iyahang nakab-ut nga kalampusan, inspirasyon niini ang iyahang pamilya ilabi na ang ginikanan nga naghago, naggasto alang sa iyahang mga pangandoy.
Matud pa nga hilabihan ka supportive ang iyahang pamilya hinungdan nga iyaha kining gisukli-an ug pagpaningkamot, ug gani migradwar kini sa kolehiyo isip Cum Laude.
Samtang, gitataw niini nga dakong hagit nga iyahang gi-atubang mao ang pag-‘overcome’ niini sa iyahang mga ‘negative thoughts’ gumikan sa pressure, ingun man ang kakapoy mugna sa iyahang pagtuon.
Apan bisan pa man sa maong hagit, iyaha kining gi-atubang inubanan sa hugot nga pag-ampo ngadto sa Ginoo.
Giingong kanunay gayud niini nga gibutang sa iyahang hunahuna ang mga pulong nga, “Put God first”.
Mitambag usab si Mahilum ngadto sa mga nangandoy nga mahisusama kaniya, gikinahanglan lang gayud nga maningkamot apan dili usab maayo nga isakripisyo ang panglawas.
Sa pagkakarun, gipahibalo sa engineer nga mupahuway una kini ug dayung mupadayon sa graduate school.
