CEBU – Nagsugod na ang bulldozing ug reblocking sa lima ka sityo nga naapektuhan sa sunog sa Barangay Punta Princessa, dakbayan sa Sugbo.
Opisyal na nga nagsugod ang reblocking ug bulldozing nga gipasiugdahan sa City Disaster Risk Reduction and Management Office (CDRRMO) ug Department of Engineering and Public Works (DEPW).
Katuyoan sa reblocking nga masigurong ang lugar adunay igong agianan alang sa emerhensya nga pagtubag sama sa mga ambulansya, mga trak sa bombero, ug uban pang mga salakyanan.
Dugang pa,nga ang pag-reblock usab makapugong sa umaabot nga mga sunog tungod kay ang bag-ong network sa karsada magbutang sa tukma nga gilay-on alang sa mga bilding ug makunhuran ang peligro sa pagkaylap sa sunog sa umaabot.
Matud pa ni Disaster Council chairperson,Atty.Gerry Carillo,nga ang reblocking molanat og dili molapas sa usa ka buwan sanglit gitugotan lang ang siyudad nga gamiton ang publikong tunghaan isip evacuation center hangtod sa Hunyo 30.
Gipaabot ni Atty.Carillo nga i-reblock na ang maong lugar aron makatukod og balik ang mga residente sa ilang mga balay gawas lang niadtong mga lote nga direktang apektado sa reblocking.
Giingung ang mga permanenteng mabakwit tungod sa reblocking, adto sila magpuyo sa temporaryong kapuy-an sa Sitio Tuburan, diin magamit ang 1,500 metro kwadrado nga lote.
Labing menos 200 ka van-type housing ang ibutang alang sa mga namakwit nga pamilya.
Alang sa long term, usa ka medium-rise condominium type socialized housing ang tukoron sa samang lote sa Sitio Tuburan diin ang mga apektadong pamilya mahimong ibalhin ubos sa socialized housing program sa dakbayan.
Gilauman nga modumala ang Division for the Welfare of the Urban Poor sa kalihukan, relokasyon, ug pagbalhin sa mga namakwit nga pamilya.
Kasamtangang,dili pa klaro kung pila ka mga pamilya ang permanenteng nabakwit tungod sa reblocking.
