CEBU CITY-Nipahigayon og groundbreaking ug capsule-laying ceremony ang Vicente Sotto Memorial Medical Center (VSMMC) alang sa pagtukod sa Regional Infectious Disease and Tropical Medicine (RIDTM) building niadtong Huwebes, Agosto 29, 2024.
Gitambongan ang maong kalihokan ni Senador Ramon “Bong” Revilla, kinsa nigahin og budget nga nagkantidad og P120 milyones gikan sa Senado alang sa unang hugna sa proyekto.
Ang proyekto naglakip sa pagtukod og 8-storey nga building nga maglakip sa 33 ka mga lawak sa ward nga ang matag usa adunay shower, kasilyas, ug luna nga makaakomodar og unom ka higdaanan.
Ingon man nga ang unang hugna sa proyekto naglangkob lamang sa unang duha ka andana sa building ug gipanglantawan kini nga matapos sa buwan sa Nobyimbre ning tuiga.
Magsilbi kini nga pagpangandam batok sa laing pandemic nga posibleng moigo sa atong nasud ug makapahimo sa mga Sugbuanon nga mas lig-on batok sa makatakod nga mga sakit.
Nipadayag sa iyang pasalamat si Department of Health (DOH) Secretary Teodoro Herbosa diin gitataw niini nga dili lang sa mga pasyente sa Sugbo ang mtabangan niini kon dili lakip na sa Kabisay-an ug Mindanao.
Misaad usab nga ipadayon ang tatak sa pag-atiman ug kalidad isip usa ka institusyong medical si Dr. Gerardo Aquino, kinsa hepe sa ospital sa VSMMC, uban sa tabang sa dagkong liderato sa ospital ug sa mga empleyado niini.
Dugang pa niya nga ang VSMMC kay usa ka natudlong pasilidad alang sa kapin sa 17 ka mga specialty centers gawas pa sa giisip kini nga usa ka apex tertiary hospital.
