CEBU CITY — Gihatod sa Philippine Coast Guard (PCG)-7 ang mga relief goods gikan sa Department of Social Welfare and Development (DSWD)-7 ngadto sa apektado sa paghaguros sa bagyong Ursula sa amihanang Sugbo ug sa uban pang lugar.
Matud sa tigpamaba sa PCG-7 nga si Liuetenant Jr. Grade Michal John Encina nga gikarga sa barkong BRP Suluan ang 2,800 ka mga boxes sa pagkaon ug hygiene kits padung sa Caranza ug Malapascua Islands.
Dugang pa sa tigpamaba nga mipahigayon usab ang Coast Guard og marine surface patrol alang sa pag-assess sa epekto sa maong bagyo human maigo ang Northern Cebu niadtong pagsugat sa Pasko.
Gibarugan ni Encina nga kanunay nga andam ang PCG-7 alang sa pagresponde sa mga labing apektado taliwa sa kasadya ning panahon sa Pasko ug bag-ong tuig.
Tabang alang sa silingang rehiyon
Mohatag ug relief supplies ang Visayas Disaster Resource Center (VDRC) sa DSWD ngadto sa mga apekatdong baranggay sa Tacloban City gumikan sa bagyong Ursula.
Kini ang gibutyag ni Roger Dale Armecin ang Admin Officer sa VDRC.
Matod pa ni Armecin nga nagpadala ug request ang Tacloban sa maong buhatan sa pagpangayu ug dugang nga ayuda sa mga apektadong baranggay.
Ang VDRC, mandato sa DSWD para inkaso kung adunay mga emerhinsiya nga mahitabo makahatag ug supplies ang VDRC.
Human sa pagpamutos sa mga relief supplies, ipa-deliver usab kini dayun ngadto sa Rehiyon 8.
Dugang pa sa admin officer nga ang Visayas ug Mindanao ang ilang i-cater. Apan kung magkinahanglan usab ang area sa Luzon andam usab sila nga mo-tabang. (with reports by Bombo Crisle Adlawan/Lahvi Quiñones/GN)
