CEBU CITY-Napakyas sa pagkolekta sa kapin sa P45,000 ngadto sa Mambaling Police Station ang empleyado sa usa ka remittance firm nga giingong nawad-an og gibana-bana nga P3 milyones nga salapi sa dihang milupad kini gikan sa iyang backpack sa viaduct sa South Road Properties niadtong Hulyo 4, 2023.
Matud pa ni Cebu City Police Office (CCPO) Director Colonel Ireneo Dalogdog niingon nga ilang awhagon si John Mark Barrientos ug ang nagpaila nga iyang supervisor nga moisyu og sertipikasyon nga ang maong kuwarta iya sa kompanya.
Dugang pa, nga gusto nilang pasakaan og kaso ang mga tawo nga nanguha og peso bills sa lain-laing denominasyon nga nagkatag daplin sa viaduct, apan ang duha nagdumili sa paghingalan sa ilang kompanya sa record.
Kini gumikan kay gusto nila nga matino kung nagsulti ba si Barrientos sa tinuod bahin sa eksakto nga kantidad nga iyang gidala nianang adlawa.
Matod ni Dalogdog nga kapin sa P1 milyones ang nauli ngadto kang Barrientos sukad sa insidente.
