Giisip ni Senador Loren Legarda nga ang eleksyon sa liderato sa Senado nga gipahigayon niadtong Miyerkules, Hunyo 3, “unconstitutional” o supak sa Konstitusyon ug walay pulos.
Sa iyang opisyal nga video statement, gipasiugda sa senador nga ang pag-instalar ni Senador Sherwin Gatchalian isip Senate President Pro Tempore ug isip Acting Senate President kay ilegal.
Matud niini, ang bag-ong mayoriya nga grupo dili makapili og bag-ong mga opisyal tungod kay wala sila makakuha sa gikinahanglan nga gidaghanon sa mga boto nga gikinahanglan sa balaod.
Gipresentar sa senador ang legal nga mga basehan nganong dili angay ilhon ang bag-ong liderato.
Gisaysay niini nga subay sa Article VI, Section 16 sa 1987 Constitution ug Rule II, Section 2 sa Rules of the Senate, gikinahanglan ang mayoriya nga boto sa tanan niining mga miyembro aron makapili og usa ka opisyal. Tungod kay adunay 24 ka senador sa nasud, ang mayoriya katumbas sa 13 ka boto.
Gidugang sa magbabalaod nga 12 lang ka senador ang mibotar sa sesyon, busa wala silay legal nga gahum sa pag-aprobar sa bisan unsang reorganisasyon.
Sa pikas bahin, gidapit ni Sen. Alan Peter Cayetano si Sen. Win Gatchalian nga magkita aron hisgutan ug husayon kung kinsa ang tinuod nga Presidente sa Senado.
Matud ni Cayetano sa iyang Facebook live nga hisgutan sa ilang panagkita ang itanyag niini nga solusyon hilabi na nga gikanayon sa senador nga ang tulo ka libro nga anaa niini (mga lagda sa Senado, Konstitusyon, Bibliya) nag-ingon nga ang lehitimong Presidente sa Senado napili niadtong ika-13.
