Mibuwelta si Davao City Representative Paolo “Pulong” Duterte kang House Majority Leader Sandro Marcos, human siya niini gibatikus sa isyu sa giingong P51-bilyon nga ‘ghost’ projects.
Kini naggikan sa pamahayag ni Rep. Duterte, diin iyang giingon nga gipili ni Presidente Ferdinand Marcos Jr. si Isabela Rep. Faustino “Bojie” Dy III nga mopuli kang dating Speaker Martin Romualdez aron matabunan ang giingong mga bulok nga sistema sa Kongreso, ilabi na ang kahiusang kalambigitan sa pipila ka mambabatas sa mga kuwestiyonableng flood control projects.
Gipanghimakak kini sa batan-ong Marcos ug niingon nga tungod sa kanunay nga pag-absent ni Duterte, wala siya hatagi og igong impormasyon ug gipasanginlan pa siya nga nagkapuliki sa pagpangita og P51-bilyones nga infrastructure projects sa distrito.
Apan giinsister ni Duterte nga walay ‘ghost projects’ sa iyang distrito, ug iyang giingon nga klaro nga gibutyag sa DPWH Region XI ang tibuok breakdown sa P49.8-bilyon nga proyekto sa Davao.
Sa kataposan, mihagit si Duterte kang Rep. Sandro Marcos nga magpa-hair follicle drug test silang duha, apil ang iyang amahan nga si Presidente Ferdinand Marcos Jr.
