LAPU-LAPU CITY – Gitawag ni Lapu-Lapu City Mayor Junard ‘Ahong’ Chan nga “palusut” ang pamahayag ni Rep. Paz Radaza nga magpaabut kini sa klaru nga direktiba ni DILG Sec. Eduardo Año una nga biya-an ang opisina niini sa City Hall.
Matud ni Mayor Chan nga wala kini nasayud sa ‘clear directive’ nga gipasabut sa kongresista kung diin gi-anunsyu naman kini ni Sec. Año.
Gituhu-an sa mayor nga rasun na lang kini ni Radaza arun nga dili gayud hingpit nga biya-an ang maong opisina.
Subay niini, giawhag ni Chan ang kongresista nga mag-‘move on’ na lang ug angayan nang dawatun ang kapildihan ug mubalhin na sa opisina gawas sa City Hall.
Gipahibalu sa local chief executive nga aduna na’y gi-abangan nga opisina si Radaza sa Barangay Basak sa Lapu-Lapu nga mikantidad ug P25,000 hinungdan nga angayan na niini nga mubalhin ang kongresista.
Gihimug-atan ni Mayor Chan nga pasagdan na lang una niini si Radaza ug magpadayun kini sa iyahang trabaho isip mayor sa dakbayan dungan sa pagsiguro nga dili makababag sa iyahang mga proyekto ang kongresista.
Hinu-un, giklaru niini nga welcome sa iyahang pamunu-an kung unsa may mga proyekto ni Radaza alang sa kaayuhan sa dakbayan sa Lapu-Lapu.
