CEBU CITY – Gikalipay ni Police Colonel Royina Garma, ang Cebu City Police Office Director, ang pag-appoint niini isip bag-ung general manager sa Philippine Charity Sweepstakes Office (PCSO).
Sa eksklusibo nga pakighinabi sa Bombo Radyo Cebu kang Col. Garma, gipasalamatan niini si Presidente Rodrigo Duterte sa pagsalig ug kumpyansa nga gihatag kaniya ug misa-ad nga dili kini niya pakyason.
Matud pa nga pagatutukan niini ang mga reporma, ingun man ang mga charity projects sa gobyerno.
Giangkun usab ni Garma nga adunay mga isyu sa korapsyon nga gi-atubang ang PCSO hinungdan nga iyahang pagatun-an kung unsa-un niini arun nga mahimung ‘transparent’ ang ahensya.
Subay niini, gipadayag sa police director nga pagatun-an niini karun nga makunhuran o matangtang gayud ang mga nahisgutang kontrobersiya.
Gilauman ni Police Col. Garma nga ihatag usab sa mga tawu ang kooperasyon ug suporta isip bag-ung mangulo sa PCSO hulip kang Ret. Marine general Alexander Balutan arun nga mapatuman ug tarung ang mga programa sa ahensya.
Si Garma ang lumad nga taga Cagayan Valley ug 22 ka tuig na sa active service.
Usa siya ka single mother kung diin ang iyang anak nga babae nakabase sa Davao City.
Buwag kini sa iyang kanhi bana nga si Chief Inspector Roland Vilela nga nalambigit kniadton sa rape case ug sex scandal sa Davao.
Giingong dako og tipik sa pagka policewoman ni Garma ang iyang nahimo sa Davao City samtang ubos kini sa pagdumala niadtong mayor pa lamang si Pangung Duterte. Dinhi usab nagkahigala ang duha.
Si Garma ang una usab nga na-assign sa police administrative office sa Davao City sulod sa duha ka tuig ayha nahimong chief sa Anti Vice Office ng dakbayan.
Sunod niini gipanguluhan ang Women and Children’s Protection Desk sa Davao sa sulod sa lima ka tuig.
Niadtong 2004 gibalhin siya sa CIDG central office sa Metro Manila.
Gipasidunggan usab kini isip chief of police sa Sasa police sa Davao City ug isip pangu sa Sta. Ana police precinct nga giisip kaniadtong nga problem areas.
Si Col. Garma graduate sa Philippine National Police Academy niadtong 1997 ug nalakip kini sa unang batch sa mga women police lieutenants sa akademya.
Sa tour of duty ni Garma sa lalawigan sa Cebu, nahimong sentro ang panagbangi nila ni Cebu City Mayor Tomas Osmeña kung diin nagbato-ay ang duha og mga alegasyon.
Apan wala nagpadala ang babae nga police official tungod na usab sa kumpiyansa kaniya ni Pangulong Duterte.
