Gipaambit sa Department of Economy, Planning, and Development (DepDev) nga gilauman nga mo-import ang Pilipinas og kapin sa 4 milyon metriko tonelada (MMT) nga bugas karong tuiga tungod sa kakuwang sa lokal nga produksiyon sa bugas.
Basi sa datus sa Department of Agriculture (DA) ug sa Philippine Statistics Authority (PSA), gibanabana nga adunay 2.653 MMT production shortfall karong tuiga, busa magkinahanglan ang nasud og mas dakong volume sa imported nga bugas aron matubag ang panginahanglan.
Ang lokal nga produksyon sa bugas gibanabana nga moabot sa 12.888 MMT sa katapusan sa tuig, samtang ang kinatibuk-ang panginahanglan anaa sa 15.54 MMT.
Sa pagkakaron, 2.3 MMT sa imported nga bugas ang nakasulod na sa nasod gikan sa Enero hangtod Hulyo 10, sumala sa Bureau of Plant Industry.
Sa laing bahin, ang Vietnam mao gihapon ang nanguna nga supplier, nga adunay 1.76 MMT, gisundan sa Myanmar (306,702 MT), Thailand, Pakistan, ug India.
Nag-isyu usab ang gobyerno og 3,636 ka sanitary ug phytosanitary import clearances (SPSICs) alang sa pagpalit sa 3.18 MMT nga imported nga bugas.
Bisan tuod gipaabot nga motaas ang importasyon karong tuiga, gipasalig ni Agriculture Assistant Secretary Arnel de Mesa nga mas ubos kini sa record-high nga 4.8 MMT niadtong 2023.
Gitumong sa DA nga mamentinar ang importasyon tali sa 3.8 ngadto sa 4 MMT.
Samtang, malaumon ang DA nga makabangon ang lokal nga produksiyon human sa taas nga ani sa humay sa unang semester sa 2024, nga niabot sa 9.08 MMT, mas taas sa 8.53 MMT sa miaging tuig.
Matod ni DA Secretary Francisco Tiu Laurel Jr., aduna pay paglaom nga maabot o molapas sa 20.46 MMT rice production target sa 2025, sa tabang sa maayong panahon ug suporta sa gobyerno.
