TALISAY CITY,CEBU- Gipangita na karon sa City of Talisay – Traffic Operations and Development Authority (CT-TODA) ang usa ka lalaki nga rider nga nakuhaan sa video nga nag-“banking” ug halos makaigo pa sa laing motorista samtang gibaybay niini ang Tabunok Flyover kagabii, Abril 11, 2025.
Base sa usa ka post nga gi-upload sa netizen nga si Lyzzel Joy Alipio-Repuelo, makita sa video nga hapit makaigo ang maong rider, nga daw nag-exhibition samtang nagtabok sa Tabunok Flyover padulong sa habagatang bahin sa Sugbo.
Sa eksklusibong pakighinabi sa head sa CT-TODA nga si Jonathan “Joy” Tumulak, iyang gipadayag nga nadawat sa buhatan ang reklamo bahin sa reckless driving batok sa maong rider.
Nakig-alayon na usab sila sa Land Transportation Office (LTO) – Region 7 Operations Division aron mahibaw-an ang identidad sa rider ug mapatawag kini sa ilang opisina.
Nanghinaut si Tumulak nga unta likayan ang mga buhat nga mahimong hinungdan sa disgrasya, sama sa reckless driving, aron dili makapahasol o makapeligro sa ubang mga motorista. With Reports | Bombo Rexmond Omega
