Gikumpirma sa Police Regional Office 7 (PRO7) nga walay nahitabong major o untoward incidents atol sa tibuok pagdumala sa 48th ASEAN Leaders’ Summit 2026 sa dakbayan sa Lapu-Lapu. Kini nagpakita sa malampusong implementasyon sa hugot nga security operations aron maseguro ang kaluwasan sa mga delegado, partisipante, ug sa publiko.
Matud ni Acting Regional Director PBGen Arnold E. Abad, dako kaayong hinungdan sa malinawon ug organisadong dagan sa summit ang lig-on nga koordinasyon sa mga law enforcement agencies, uniformed services, government agencies, Local Government Units, force multipliers, private stakeholders, ug ang kooperasyon sa komunidad.
Sa usa ka eksklusibong pahayag, mipasabot si Abad og pasalamat sa publiko tungod sa ilang pasensya ug pagsabot sa ipatuman nga traffic adjustments ug security measures nga nakatabang sa malinawon ug luwas nga pag-host sa maong internasyonal nga kalihukan.
Gidayeg usab niya ang dedikasyon ug sakripisyo sa mga sakop sa Philippine National Police, Armed Forces of the Philippines, Philippine Coast Guard, Bureau of Fire Protection, Bureau of Jail Management and Penology, emergency response teams, ug uban pang partner agencies nga mitabang sa security operations sa summit.
Matud pa ni Abad, ang taas nga lebel sa propesyonalismo ug dedikasyon sa mga personnel nagpakita sa pinakataas nga standard sa public service atol sa maong internasyonal nga kalihukan.
Gipasalamatan usab sa PRO7 ang suporta sa ubang Police Regional Offices sa nasod nga mipadala og augmentation personnel ug logistical assistance aron mapalig-on ang security coverage sa Central Visayas.
Gibutyag sa PRO7 nga ang malinawon nga resulta sa ASEAN Summit maoy pamatuod sa epektibong inter-agency collaboration, operational readiness, ug lig-on nga partnership tali sa kapulisan ug komunidad sa pagmintinar sa kalinaw, kahapsay, ug kaluwasan sa publiko.
