CEBU – Anaa sa full alert status ang Regional Mobile Force Battalion sa Central Visayas (RMFB-7) human sa kamatayon sa duha ka Army intelligence officers, kinsa gibanhigan sa wala mailhing mga mamumuno niadtong Huwebes, Nob. 24, sa Barangay Camboguit sa Sipalay City sa Negros Occidental.
Kini ang gibutyag ni Police Lieutenant Colonel Ronan Claravall, force commander sa RMFB-7, nga iya nang gimandoan ang iyang mga personahe nga nakabase sa Negros Oriental nga andam bisan unsang orasa kung adunay susamang insidente nga mahitabo sa Negros Oriental.
Napatay atol sa pag-ambush sila si Sergeants Regie Glendro ug Ken Camilan sa 47th Infantry Battalion.
Matod ni Claravall nga gidoble usab nila ang ilang mga paningkamot ug intelligence gathering batok sa bisan unsang hulga sa ilang tagsa-tagsa ka dapit nga sakop.
Nasayran nga ang RMFB-7 adunay duha ka maneuver company nga nakabase sa Negros Oriental, ang 704th station sa lungsod sa Mabinay ug 705th sa Santa Catalina.
Samtang sa pikas bahin, sa habig ni Police Brigadier General Roderick Augustus Alba, PRO-7 director, niingon nga bisan og malinawon ang lugar, dili kini angayan nga mahimong rason nga mokompyansa.
