CEBU CITY — Gimanduan sa Philippine Coast Guard (PCG)-7 ang Jomalia Shipping nga mo-submit og marine protest human sa nahitabong pagtakilid sa usa ka roll-on-roll-off vessel sa Consuelo Port, San Francisco, Camotes Island.
Kini human nga na-out of balance ang barko nga MV Mika Mari 8 sa dihang gipakanaog ang mga rolling cargoes sa maong pantalan.
Matud sa tigpamana sa PCG-7 nga si Lieutenant Junior Grade Michael John Encina nga milarga ang maong vessel gikan sa Danao City sakay ang 149 ka mga pasahero, 18 ka mga crew members, ug 11 ka mga sakyanan lakip na ang pipila ka ten-wheeler truck.
Dugang pa ni Encina nga kalit lang nga mitakilid ang roll-on-roll-off vessel sa dihang nagmaniubra ang usa ka ten-wheeler truck pagawas sa barko.
Gidala sa tambalanan ang upat ka mga pasahero human nakaangkon og minor injuries samtang anaa sa luwas nga oahimtang ang uban pa human gi-rescue sa Coast Guard.
Sigon usab ni Encina nga mopahigayon sila og marine casualty investigation kung madawat na nila ang marine protest gikan sa Jomalia Shipping. (GN)
