Patay ang usa ka squad nga sakop sa New People’s Army Central Negros 2 (NPA-CN2), human sa engkwentrong nahitabo batok sa 94th Infantry Battalion (94IB) sa Philippine Army sa hinterlands sa Himamaylan City sa Negros Occidental, atong Biyernes sa hapon, Hunyo 6, 2025.
Sa taho nga nigawas niadtong Sabado, Hunyo 7, ang 3rd Infantry Division niila sa namatay nga si Jun-Jun “Gringo” Benoy, 24-anyos ug residente sa Sitio Ompocon sa Barangay Mahalang.
Girespondehan sa mga sundalo kabahin sa impormasyon sa presensya sa mga armadong rebelde ug nakig-alayon sa lima niini sa Sitio Bugtangan, Barangay Buenavista mga alas 4:30 sa hapon.
Ilang nakuha ang usa ka M16 rifle ug mga personal nga gamit sa mga rebelde human sa nahitabong engkwentro.
Sa usa ka pahayag, gidayeg ni 3rd Infantry Division commander Maj. Gen. Michael Samson ang kolaborasyon tali sa tropa ug komunidad sa pagneutralisa sa laing salin sa NPA, diin, iyahang gikabutyag nga ang maong combat operation kabahin sa ilang padayong pagduso sa pagpatumba sa nahibiling elemento sa communist-terrorist group ug pagsiguro nga dili na sila maka-angkon og kusog sa Negros.
Gisubli ni Samson ang iyang panawagan alang sa nahibiling mga NPA fighters nga mosurender na kini ug mopahimulos sa mga benepisyo ubos sa Enhanced Comprehensive Local Integration Program sa gobyerno. | via Bombo Irene Ardiente
