Nagpadayon hangtud karon ang search operations alang sa usa ka 26-anyos nga lalaki nga nahulog sa kadagatan sa Talisay Anchorage Area niadtong Biyernes, Pebrero 20.
Ang biktima nailhan nga si John Caryl Romano, 26-anyos, usa ka checker ug surveyor sa Webb Fontaine Asia Inc., ug residente sa Barangay Quiot, Pardo, dakbayan sa Sugbo.
Subay sa incident report gikan sa Jimhan Shipping Corp., si Romano kabahin sa usa ka survey team nga nagtrabaho uban sa barkong MV Jerrica M, samtang nagpahigayon og loading operations ship-side uban sa foreign vessel nga MV Gooby.
Matud sa kompanya, nakit-an sa usa ka crew member sa MV Jerrica M si Romano nga nidalin-as ug nahulog gikan sa “pilot ladder” (o nailhan usab nga “monkey ladder”) pasado alas 9:40 sa buntag sa naasoyng adlaw.
Dali nga nideklarar og “man overboard” alarm ang mga tripulante, dungan sa paglabay og life ring ug pagsulay sa pagluwas sa biktima, apan wala na kini makit-an pag-usab.
Sa pagkakaron, wala pa moundang ang mga awtoridad sa pagpangita kaniya sa maong dapit.
