CEBU – Aduna nay dugang tinubdan sa presko nga tubig ang mga molupyo sa lungsod sa Bantayan, amihanang bahin sa Sugbo.
Kini ang gipahibawo sa lokal nga kagamhanan sa Bantayan nga nahuman na ang pagtukod sa seawater desalination plant sa Barangay Luyongbaybay ug andam na kining mo-operate.
Nagpahigayon na usab ang mga opisyal sa Bantayan og water tasting test niadtong Martes, Marso 8, 2022, aron maseguro nga luwas nga gamiton ang tubig gikan sa dagat, nga giproseso sa planta.
Gitukod ang seawater desalination plant aron mahatagan ug alternatibong tinubdan sa suplay sa fresh water ang mga residente sa Bantayan, ilabina kadtong gikan sa mga islet-barangays ug mga lugar nga wala gihapoy access sa mainom nga tubig.
Isip kabahin sa usa ka grupo sa isla nga nahimutang sa 140 kilometros amihanang-sidlakan sa dakbayan sa Sugbo, gamay ra ang fresh water sa surface water sa Bantayan.
Kadaghanan sa mga lokalidad sa Sugbo naggamit sa surface water isip tinubdan sa presko nga tubig.
Matod sa taho gikan sa international environmental organization nga Mongabay, nagpabiling hagit ang pagmintinar sa presko nga tubig sa Isla sa Bantayan.
