Nagplano si kanhi Executive Secretary Vic Rodriguez nga daling mopasaka og motion for reconsideration (MR) sa Korte Suprema human gisalikway ang iyang petisyon, nga mikuwestiyon sa naunang desisyon sa Senate Impeachment Court bahin sa gikinahanglang boto nga two-thirds.
Matod ni Rodriguez, kasamtangan niyang gitun-an ang desisyon sa Korte Suprema ug nagtinguha siya nga mopasaka sa MR sulod sa 15 ka adlaw gikan sa pagkadawat sa resolusyon.
Gipadayon sa kanhi executive secretary ang baruganan nga tukma ang panahon sa maong lakang ug dili kini premature, bisan pa man sa pagsalikway niini.
Gikuwestiyon usab sa abogado kung maghulat ba kaha ang Korte Suprema og “conviction” o pagdeklarar nga sad-an ang opisyal una pa kini molihok sa maong isyu, kung si Bise Presidente Sara mismo ang nagpasaka sa petisyon.
Sa laing bahin, giangkon ni Rodriguez nga wala siyay “legal standing” o katungod sa pagpasaka sa kaso, sumala sa gipunting sa Korte Suprema, tungod kay dili siya partido sa impeachment trial ni konektado sa Office of the Vice President.
Bisan pa niini, miinsistir ang abogado nga ang iyang gipasaka sa Korte Suprema nagpatungha og usa ka “constitutional question” o pangutana bahin sa Konstitusyon: kung ang Senado ba, nga naglihok isip legislative body o isip impeachment court, adunay awtoridad sa paghubad sa gikinahanglang two-thirds nga boto alang sa pagdeklarar nga sad-an ang usa ka opisyal nga mahimong i-impeach, sa paagi nga ilang gihimo.
Nangatarungan siya nga ang maong paghubad mahimong isipon nga usa ka pag-amyenda o pag-usab sa Konstitusyon.
