CEBU CITY– Gitataw ni Department of Social Welfare and Development (DSWD-7) Assistant Regional Director Shalaine Lucero nga nagpadayon ang ilahang distribusyon sa Social Amelioration Program (SAP) alang niadtong mga ‘wait-listed’ o kadtong mga wala malakip sa first tranche apan angayan unta nga makadawat.
Matud ni Lucero sa dihang nahinabi sa Bombo Radyo Cebu atok sa tulumanong Bombohanay Bigtime nga nasugdan na ang pagpang-apud-apud sa probinsiya sa Sugbo, Negros Oriental, probinsiya sa Bohol, ingon man sa Siquijor.
Samtang ang second tranche sa SAP ang wala pa masugdan ang distribusyon apan giingong nakasumitir na sila ug listahan sa Cebu Province ngadto sa ilahang national office.
Sigon pa nga padayon ang ilahang koordinasyon ngadto sa mga Local Government Units (LGUs) alang sa ‘scheduling’ arun nga ma-organize ang tanang hingtungdan ilabi na ang mga financial payment providers diin ‘digital‘ na ang paghatag sa naasoy nga cash assistance.
Gisiguro ni Lucero nga maghimo ug anunsyo ang DSWD kung ugaling sugdan na ang distribusyon sa ikaduhang hugna sa Social Amelioration Program (SAP).
Nanghinaut na lang kini ug pagsabot sa publiko ug lugwayan pa ang pasensya alang sa pag-abot sa second tranche diin giingong sigurado nga malakip na gayud ang angayan nga mahatagan diin daghan na silang lista nga nasumitir sa national office. | SBR
