CEBU CITY — Nagisa ang mga security officers sa gitulis nga mall sa Mandaue City atol sa ilang meeting tali sa Peace and Order Authority ug mga business establishment owners sa dakbayan.
Sentro sa maong diskusyon mao ang pagpatubag sa mga security officers sa J Center Mall kung nganong dali lang nga nakasulod ang mga tulisan ug kung nganong walay armas ang mga nag-roving nga gwardiya sa sulod.
Matud sa security officer sa mall nga si Gary Malangkis nga adunay armas ang mga gwardya sa entrance area apan walay armas ang uban pang mga gwardya sa sulod gumikan sa kahadlok nga madamay ang katawhan kung adunay kagubot.
Gawas niini, nahisgutan usab ang mga bag-ong security measures nga gustong ipatuman sa management sa maong mall, ilabi na ang pagdugang og mga gwardiya sa entrance.
Matud ni Mandaue City Mayor Jonas Cortes nga mas maayong tan-awon sa security officers ang mga weak entry points ug pahugtan ang siguridad niini aron makalikay kini sa mga dautang elemento.
LEKSYON SA MGA MALL OPERATORS
Gitataw ni Mandaue City Mayor Jonas Cortes nga magsilbing leksyon alang sa mga mall operators ang nahitabong pagpanulis sa mga jewellry shops sulod sa J Center Mall.
Nagkanayon si Cortes nga miresulta sa dautang panghitabo ang giingong pagdaginot sa management sa mall tungod sa kagamay sa ilang mga blue guards.
Kini ang nahimong hinungdan nga, matud pa, gipahimuslan sa mga tulisan ang maong sitwasyon.
Una nang nagkanayon si Police Colonel Jonathan Abella, ang Mandaue City Police Office director, nga gitun-an sa tulisan ang seguridad sa mall sa wala pa nahitabo ang pagpanulis niadtong Sabado sa gabii.
Misugyot si Cortes ngadto sa management sa mall nga pun-an ang ilang mga gwardya ug tagsaan kini og armas.
Gawas niiini, lakip sa gihingusgan sa mayor nga ilakip usab sa pagpatrolyar sa mga sakop sa MCPO ang premises sa mall alang sa mas hugot nga seguridad.
