Gipangandaman na sa mga ahensya sa gobyerno sa Central Visayas ang nagsingabot nga Semana Santa karong 2026 pinaagi sa pagpahimutang sa mga personahe ug kahimanan aron maseguro ang kaluwasan sa minilyon ka mga biyahedor gikan karong Marso 29 hangtod Abril 6.
Ang Philippine Coast Guard District Central Visayas, Department of Health-Central Visayas (DOH-7), Bureau of Fire Protection Region 7 (BFP-7), ug ang PAGASA Visayas naghiusa sa ilang mga plano atol sa gipahigayong emergency preparedness and response meeting.
Ipahamtang sa Philippine Coast Guard ang red alert status gikan sa Marso 28 hangtod Abril 5 aron pagdumala sa dagsa sa mga pasahero sa kadagatan ubos sa “Oplan Byaheng Ayos.”
Apil sa mga lakang ang pag-inspeksyon sa mga sakayan, pagseguro sa pagsunod sa lagda sa Maritime Industry Authority, ug ang pagdeploy sa mga medical team ug response group sa mga pantalan sa tibuok rehiyon.
Gipataas usab sa DOH-7 ang Code White Alert sugod karong Marso 29 hangtod Abril 6, diin aktibo na ang ilang Regional Health Emergency Operations Center sulod sa 24 oras matag adlaw.
Nakapreposisyon na usab ang kapin sa P1.3 milyones nga balor sa mga tambal, suplay sa tubig, sanitation, ug nutrisyon sa upat ka rehiyonal nga clusters.
Subay niini, giawhag sa mga opisyal sa panglawas ang publiko nga magpabilin nga hydrated ug likayan ang dugay nga pagbulad sa init aron makalikay sa mga sakit nga may kalabotan sa kainit.
Sa bahin sa BFP-7, gipakatap na ang 437 ka mga personahe, 145 ka mga fire engine, 17 ka ambulansya, ug 39 ka mga medical emergency personnel sa Cebu, Bohol, ug Lapu-Lapu City ubos sa “Semana Santa Lakbay Alalay 2026.”
Ibutang ang mga unit sa mga pantalan, terminal sa bus, mga simbahan, ug mga dagkong tindahan aron masiguro ang daling pagtubag sa emerhensya.
Samtang gipahibalo sa PAGASA Visayas nga gipaabot nga mahimong maayo ang panahon, nga dunay mga higayon nga panganuron ug mga pat-ak nga pag-ulan. Hinuon, gipasidan-an ang publiko nga ang heat index mahimong moabot og 35 hangtod 40 degrees Celsius, bisan pa og walay gipaabot nga bagyo nga mosulod sa rehiyon.
Naglatag usab ang Police Regional Office 7 og unom ka puntos nga security plan, nga naglakip sa mas hugot nga koordinasyon sa mga lokal nga opisyal ug pagbutang og mga assistance desk sa mga dapit nga daghan ang tawo, ug gihangyo sa kapulisan ang publiko nga magpabiling mabinantayon ug ireport dayon ang bisan unsa nga kadudahang kalihukan.
