Gisiguro sa Mactan-Cebu International Airport (MCIA) ang kaluwasan sa tanang mga pasahero ug hapsay nga byahe subay na sa pagpatuman sa temporary travel ban alang sa mga bisita gikan sa China ug sa mga special administrative regions.
Nakig-alayon na karon ang mga namunuan sa MCIA ngadto sa mga ahensya sama lang sa Bureau of Immigration ug Bureau of Quarantine aron masiguro nga matuman ang kamanduan ni Presidente Rodrigo Duterte subay na sa outbreak sa novel coronavirus.
Sa press statement nga giluwat sa MCIA, nagkanayon kini nga aduna silay isolated holding area alang sa mga pasahero.
Dugang pa niini nga exempted sa travel ban ang mga Pilipino apan kinahanglan silang ipaubos sa 14-day quarantine, pinasubay na sa ilang mga lakang.
Sa gihapon, gipatuman sa MCIA ang strikto nga precautionary measures aron kalikayan ang makalilisang nga coronavirus.
Kini sama na lang sa mga in-flight announcements, mas hugot nga thermal scanning, hand sanitization ug air disinfection, ug pagsul-ob og face masks ug gloves alang sa mga frontliners.
“In response, MCIA has already designated an isolated holding area for these passengers who are allowed to disembark. This holding facility is closed off to non-essential airport employees and is connected to a separate bus bay to ensure proper handling and transport of the quarantined passengers, in line with the required stringent quarantine procedures.”
Naka-standby usab ang medical team gikan sa Bureau of Immigration ug sa Department of Health sa arrival area aron daling ma-atiman ang kinsang mataptan sa nCoV.
Padayon usab ang ilang information campaign kalabot na sa paglikay sa maong sakit ug mohatag usab ang MCIA og mga anunsyo ngadto sa mga pasahero.
Mi-awhag ang mga namunuan sa airport nga makig-alayon ang mga pasahero sa ilang airline company kalabot na sa ilang flight schedules, ug uban pa.
