CEBU CITY- Gipaniguro sa kagamhanang dakbayan sa Sugbo nga hapsay gihapon angpagpatuman sa seguridad atol sa pagsaulog sa Sinulog 2025 bisan pa man sa bag-ong pangu sa Cebu City Police Office (CCPO).
Mao kini ang gipadayag ni Cebu City Mayor Raymond Alvin Garcia atol sa press conference niini kagahapong adlawa Enero 13 diin gitataw niini nga kaabag sa pagdumala sa seguridad sa kapulisan kay mao ang sakop sa kagamhanang dakbayan nga gipanguluhan ni Cebu City Councilor Joel Garganera isip Security Committee Head sa Sinulog Organizing Committee.
Kabahin niini, gihatagan og direktiba ni Mayor Garcia si PCol. Enrico Figueroa, ang natudlo nga CCPO Officer-in-Charge, nga iyang tun-an ang mga plano nga gibuhat alang sa Sinulog ug ipatuman kini sa hingpit.
Sa pikas bahin, gipaniguro sab ni PCol. Figueroa nga mabuhat niya og tarong ang direktiba nga gihatag sa Maypr sa dakbayan aron sa hapsay ug malinawn nga kapistahan.
Una na nga nipadayag sa iyahang kasagmuyo si Cebu City Mayor Raymond Alvin Garcia sa kausaban sa City Director sa Cebu City Police Office (CCPO), ilabi na nga dungan kini sa pagsaulog sa Sinulog.
Kani ang pamahayag ni Mayor Garcia sa iyang press conference nga gipahigayon sa Cebu City Hall gahapong adlawa, Enero 13, 2025, nga si kanhi City Director PCol. Antonietto Cañete ang nanguna sa pagpangandam alang sa Sinulog, ilabina mahitungod sa kalinaw ug kahapsay, busa nakaapekto kini sa pagpangandam sa kapistahan.
