Masaligon si Senador Bam Aquino nga dako og ikatabang ang Classroom-Building Acceleration Program (CAP) Act sa pagpadali sa pagtukod og classrooms sa mga pampublikong tunghaan ug pagsulbad sa kakuwang sa classrooms sa nasud.
Gipasabot sa senador nga kung maaprobahan, ang Senate Bill No. 121 o ang CAP Act magtugot sa mga local government units (LGUs) ug non-government organizations (NGOs) nga makatukod og mga classroom subay sa national standards, gamit ang pundo nga maggikan sa nasudnong kagamhanan.
“I-bypass natin ang DPWH (Department of Public Works and Highways). Ibigay natin ang pondo sa LGU at sa NGO na may track record sa paggawa ng schoolbuilding. Sa tingin namin, mas mabilis ang paggawa at mas mura pa, sa tamang halaga,” matod ni Aquino, chairperson sa Committee on Basic Education.
Giawhag usab sa senador ang gobyerno sa pagsalig sa mga may katakus nga NGOs ug dedikado nga LGUs nga determinado nga mopataas sa kalidad sa edukasyon sa ilang tagsa-tagsa ka komunidad.
Gisubli usab ni Aquino ang iyang panawagan nga pakunhuran ang pipila ka pundo alang sa flood control projects ug ibalhin kini sa edukasyon, ilabi na sa mga dapit nga wala gibahaan.
“Nais namin makita ang isang mas maayos na pondo ng flood control. Kutob namin, bababa ang P275 billion, mapo-focus siya sa lugar na may pagbaha. Iyong matatanggal, sa tingin namin aabot pa siguro ng P100 billion, nais namin ilagay sa edukasyon,” matud pa ni Aquino.
