Gipanghimakak ni Senador Francis “Chiz” Escudero nga nagtinguha siya sa posisyon isip presiding officer sa impeachment trial batok kang Vice President Sara Duterte.
Sa iyang unang pakigpulong isip pangulo sa impeachment court gahapon Lunes, Hulyo 6, 2026, giklaro ni Escudero nga wala niya gipangandoy ang maong papel human siya pilia sa kadaghanan sa mga senator-judges isip presiding officer pinaagi sa boto nga 12-8.
Gipasiugda ni Escudero ang kamahinungdanon sa patas ug walay pagpihig nga pagdumala sa impeachment proceedings.
Gipahinumdoman niya ang iyang mga kaubang senator-judges nga ang impeachment dili angay himuong plataporma alang sa personal nga pag-atake o mga panagbangi sa politika.
Giawhag usab niya ang prosekusyon ug depensa nga likayan ang pagpagawas og mga pahayag sa publiko samtang nagpadayon ang paghusay ug magpokus lamang sa merito sa kaso.
Matod ni Escudero, ang bugtong katungdanan sa Senado mao ang paghatag og hustisya base sa ebidensya ug balaod, bisan unsa pa ang opinyon sa publiko sa mahimong resulta sa kaso.
