Gimandoan ni Presiding Officer Chiz Escudero ang prosecution team nga mangandam og dugang mga saksi alang sa pagpadayon sa impeachment trial ni Bise Presidente Sara Duterte.
Matod ni Escudero, tungod kay duha ka tibuok adlaw Huwebes ug Biyernes ang gigahin alang sa husay, mas maayo nga adunay igong gidaghanon sa mga saksi aron malikayan ang risgo nga mahutdan og ipresentar ang prosekusyon ug mapugos sa sayo nga pagtapos sa sesyon.
Gihangyo niya si Lead Prosecutor Gerville Luistro nga iskedyulon ang dugang mga saksi alang sa Biyernes pinaagi sa pag-abante sa ilang mga schedule gikan sa listahan nga orihinal untang gitagana alang sa Lunes.
Nagpahayag si Luistro nga ilang hikayon kini sa dili pa matapos ang sesyon, samtang misugyot si Escudero nga kon mahimo, buhaton kini dayon human sa break alang sa paniudto.
