Nagpatuman ang Senado og mas hugot nga mga lakang sa seguridad subay sa gitakdang deadline alang kang Bise Presidente Sara Duterte sa pagsumite sa iyang tubag sa Articles of Impeachment.
Sumala sa pahibalo, ang Bise Presidente makasumite lang sa iyang tubag, personal man, pinaagi sa abogado, o pinaagi sa electronic mail, hangtod alas 7 sa gabii karong adlawa.
Mahinumduman nga ang summons kay pormal nga gi-serve kang Duterte niadtong Mayo 20, duha ka adlaw human ang Senado nagtigom isip impeachment court.
Diin ang impeachment trial gilauman nga magsugod sa Hulyo 6 diin si Duterte mag-atubang og mga kaso sa culpable violation of the Constitution, graft and corruption, ug betrayal of public trust.
Tungod sa gipaabot nga pagdagsa sa media ug mga tigpaluyo ug kritiko sa Bise Presidente, ang Office of the Senate Secretary naglatid og mga giya alang sa media coverage ug mga gitudlo nga lugar diin ang kampo ni Duterte mahimong magpahigayon og mga press briefing.
Sumala sa Senado, ang mga lakang gitumong aron masiguro ang hapsay, luwas, ug episyente nga proseso sa pag-file sa tubag samtang gihatagan usab ang media og igong access sa importanteng kalihokan.
Ang National Capital Region Police Office (NCRPO) nakig-alayon sa Office of the Sergeant-at-Arms aron masiguro ang kahusay sa Senado.
Samtang ang mga pulis na-deploy sa gawas sa bilding sulod sa pipila ka semana tungod sa mga aksyong protesta sa lain-laing mga grupo nga adunay lain-laing mga baruganan sa kaso sa impeachment ni Duterte ug uban pang mga isyu nga giatubang sa Senado.
Samtang, ubos sa Rules of Procedure sa Impeachment Trial, ang prosecution panel adunay lima ka adlaw aron isumite ang ilang tubag human madawat ang tubag sa Bise Presidente.
