Gipangutana sa pipila ka magbabalaod sa sesyon sa Senado niadtong Lunes, Setyembre 14, kon hain na ang mga naturalized players sa national team human sa sayo nga pagkatangtang sa defending champion nga Gilas Pilipinas gikan sa 2026 Asian Games.
Gipadayag ni Senator Bong Go, ang Chairman sa Senate Committee on Sports, ang iyang pagkadismaya nga ang mga magdudula sama sa professional basketball player nga si Bennie Boatwright wala makaduwa sa kasamtangang duwa.
Gipadali sa Senado ang pag-apruba sa naturalization ni Boatwright pinaagi sa usa ka espesyal nga sesyon aron masiguro nga makapapil siya sa mga dagkong torneyo alang sa nasud.
Natingala si Go kung nganong wala gilakip ang maong magdudula sa lineup, bisan pa sa mga paningkamot sa Senado nga aprubahan ang balaodnon nga gi-sponsor ni Senator Kiko Pangilinan.
Tungod niini, gihisgutan ni Go ang posibilidad nga gamiton sa Senado ang katungod niini sa pag-oversight aron imbestigahan ug susihon ang kasamtangang kahimtang ug nahimutangan sa mga naturalized athlete sa nasud.
Gipunting sa magbabalaod nga tungod kay ang Kongreso man ang nagproseso niining mga lakang alang sa mga langyaw nga atleta, angay nga adunay klaro nga tulubagon ug koordinasyon bahin sa kung giunsa paggamit ang ilang serbisyo alang sa national team.
