Gikabutyag si Atty. Paolo Panelo, ang tigpamaba ni Bise Presidente Sara Duterte, nga gituyo sa pipila ka mga senator-judges nga tinuyo nga nagtuis sa balaod tungod kay nahadlok sila nga dili nila kini malupig o mapildi sa usa ka patas nga impeachment trial o sa umaabot nga 2028 elections.
Matod ni Panelo, gibuhat kini sa mga senador aron ilihis ang atensyon gikan sa ilang kaugalingong mga kakulangan ug tulubagon bahin sa mga pag-abuso nga nahimo batok sa nasod, sa paglaom nga dili “madani” ang Bise Presidente.
Busa alang kaniya, nakasubo usab sa mga Pilipino ang nahimong desisyon sa impeachment court tungod kay dili kini usa ka makiangayon nga desisyon.
Gihimo ni Panelo ang maong pamahayag human nagkahiusa ang Senate Impeachment Court nga bag-ohon ang patakaran sa conviction threshold, kini human mibotar ang Senate Impeachment Court nga usbon ang gikinahanglang gidaghanon sa boto alang sa pagdeklarar nga sad-an ngadto sa 2/3 sa “mga miyembro nga, sa panahon sa pagbotar, legal ug sa tinuod nga kahimtang makahimo pa sa pag-apil sa mga proseso.”
Tungod niini nga bag-ong lagda, miusos ang gidaghanon sa kinahanglang boto aron ma-convict, o ma-acquit, ang Bise Presidente.
Tungod sa maong desisyon, gipahayag sa tigpamaba nga nakalapas ang impeachment court sa Konstitusyon ug gihimud-an niini ang katungod ni VP Sara sa sakto ug patas nga proseso sa paghukom.
Midugang si Panelo nga tungod sa maong aksyon, nawad-an na og legal ug moral nga awtoridad ang maong korte sa pagpadayon sa trial.
Bisan pa nianang kausaban, nagpabilin siyang masaligon nga dili magpadayon ang daotan, tungod kay nagpabiling nagkahiusa ug nagsuporta ang mga tawo.
