LAPU-LAPU CITY-Mibisita si Senador Sherwin Gatchalian sa mga biktima sa mga nasunogan sa Sitio Sta. Maria, Barangay Pusok, dakbayan sa Lapu-Lapu aron nga mang apod-apod og mga sako nga bugas kagahapon adlawa, Disyembre 21, 2023.
Nakighinabi ang senador kapin sa 1,500 ka pamilya nga nawad-an og pinuy-anan human sa sunog nga niugdaw sa kapin 500 ka mga balay niadtong Disyembre 12.
Human maapod-apod ang mga relief goods, gisusi usab ni Gatchalian ang kahimtang sa mga nasunogan nga nagpasilong ilawom sa Marcelo Fernan Bridge.
Gawas sa posibleng tabang pinansyal, si Gatchalian niingon nga ang iyang buhatan makigtambayayong sa kagamhanan sa dakbayan sa pagpangita og long-term nga hinabang sa mga nasunogan.
Sa pikas bahin, dako ang pasalamat ni Gatchalian sa presidente nga nipirma sa 5.7 trilyon ka pesos nga budget para sa 2024.
Dugang pa niini, dako usab nga tabang ang budget alang sa Agriculture, Philippine Coast Guard, Philippine Navy, ug Philippine Air Force aron mapalig-on ang depensa sa atong nasud.
Subay niini, ang budget dako usab nga tabang alang sa edukasyon nga naglakip sa mga classroom ug uban pang mga butang nga gikinahanglan sa usa ka eskwelahan.
