GIPAUBOS sa imbestigasyon ang nahitabong sunog sa Sitio Banika, Brgy. Talamban, sa dakbayan sa Sugbo nga miresulta sa kamatayon sa usa ka senior citizen.
Natanggong sa naugdaw nga panimalay ang biktima nga si Talino Biyong, 80 anyos, usa ka person with disability, ug nagpuyo sa nahisgutang lugar.
Matud ni Fire Officer 1 Ery Miaga sa Cebu City Fire Department nga miulbo ang ka’yo gikan sa ilang silingan.
Miresponde ang kabumberuhan pasado alas-9 sa buntag human giisa sa first alarm ug na-fire out kini sa 9:35 sa buntag.
Nakaangkon usab og first degree burn ang silingan sa biktima nga si Doris Saberon.
Gibana-banang anaa sa 30,000 pesos ang danyos sa maong sunog human naugdaw ang duha ka mga balay.
Padayong gisuta sa kabumberuhan kung unsa ang hinungdan sa maong sunog.
