CEBU CITY – Gisiguro ni Cebu City Police Office OIC Police Colonel Engelbert Soriano nga gitarung nila ang ilahang trabaho ug mas pahugtan pa ang kampanya batok iligal nga drogas dinhi sa dakbayan sa Sugbo.
Kini subay na sa nasakmit nga P20-M nga kantidad sa shabu sa duha ka managlahing anti-drug operation sa Barangay Tisa ug Hipodromo.
Matud ni Col. Soriano nga subsob ang pag-monitor sa ilahang intelligence community ug giingong wala gayud kini nila nga gi-relax.
Subay sa maong operasyon, giangkon ni Col. Soriano nga wala niini gipadaplin ang posibilidad nga adunay shabu laboratory dinhi sa Sugbo apan sa pagkakarun, gilantaw niini ang mga seaports nga hilabihan ka-open hayan dali lang nga malutsan ug iligal nga drogas.
Gidugang pa niini nga ang Sugbo dili transhipment inay usa gayud ka destinasyon nga hagbongan sa maong mga ginadiling drogas.
Hinuon, gitataw ni Soriano nga naglihok sila arun sa pagsuta sa gigikanan sa maong mga shabu, ingon man ang manufacturer niini.
Sigon pa nga posibling karung tuiga kini nila masayran.
Samtang, giklaro ni Col. Soriano nga walay pulis dinhi sa dakbayan sa Sugbo nga nalambigit sa iligal nga drogas apan iyahang gisiguro nga matangtang sa serbisyo ug mabilanggo ang bisan kinsa mang magpabadlong sa ilahang trabaho.
