NAGPASALAMAT ang mga sidewalk vendors nga gipaminaw sila ni Cebu City Mayor Edgardo Labella human nga sila makabalik unya sa ilahang naandan nga pwesto pinaagi sa pagpanindut sa ilahang mga tindahan.
Gibutyag ni Wilma Cabo, tigpamaba sa Barug Vendors Coalition, nga daku ang ilahang pasalamat nga nakadungog sa saad sa mayor ug nagkinahanglan na lang sila nga makakita ug makabati nga matuman ang maong saad.
Matud pa nga wala sila misupak sa tinguha sa lokal nga kagamhanan isip tubag sa kamanduan ni Presidente Rodrigo Duterte apan giingung kinahanglan nga dili usab sila talikdan gumikan kay ang ilahang panginabuhi-an ang anaa sa kadalanan sa dugay na nga panahon.
Gidugang pa ni Cabo nga sa kinatibuk-an sa matag tuig, makahatag ug arkabala ang mga vendors ug P21.6 million hayan angayan lang usab sila nga ilakip sa kalambuan.
Gisiguro niini nga kung ugaling matuman ni Mayor Labella ang saad niini giingung silang mga lider ang mangunay na sa pagpapahawa sa mga vendors nga mag-ali sa kadalanan.
Samtang, mihangyu usab kini sa publiko nga sabtun lang sila sa ilahang panginabuhi-an nga mao lang ang ilahang gisaligan alang sa ilahang pamilya.
