BISITAHON sa mga sidewalk vendors sa downtown area ang buhatan ni Cebu City Mayor Edgardo Labella aron masayud kung makabalik ba sila sa naandang pwesto.
Matud sa lider sa mga sidewalk vendors sa Colon nga si Wilma Cabo, nga iyang duolon ang mayor sa dakbayan aron, matud pa, maningil sa gipanaad nga pabalikon sila sa ilang pwesto.
Dugang pa ni Cabo nga ilang huwaton ang resulta sa pagbisita ni Mayor Labella sa Malacañang diin gipresentar niini ang sitwasyon sa mga sidewalk vendors sa downtown area.
Kahinumduman nga gipahawa sa Cebu City Government ang mga sidewalk vendors sa Colon Street ug Osmeña Boulevard atol sa ilang road clearing operations.
Kini subay na sa kamanduan sa Department of Interior and Local Government (DILG) nga hawanan ang bisan unsang matang sa mga obstructions sa dalan.
Samtang gihimug-atan ni Cabo nga mingaw ang ilang kahimtang sa Tabo sa Banay diin nagmingaw, matud pa, ang ilang panginabuhi-an.
Kini sukwahi sa gibutyag ni Cebu City PROBE Head Raquel Arce nga, matud pa, dli kaayo mingaw ang nahimutangan sa mga apektadong sidewalk vendors sa Tabo sa banay.
Mas nisamot usab ang ilang kahimtang sa dihang adunay gibuhat nga proyekto ang usa ka mall dapit sa ilang nahimutangan.
Gibutyag usab ni Cabo nga mas maayong makabalik sila sa naandang lugar gumikan kay dili nila kaya ang ilang kasamtangang kahimtang.
