CEBU CITY-Gibutyag ni Cebu City Mayor Edgardo Labella nga mahimo pang makabalik ang mga sidewalk vendors sa downtown area pinaagi sa ilang gitanyag nga night market.
Kini human nga nahinabi sa mayor si Sen. Christopher Bong Go diin misaad kini nga tabangan niya ang mga apektado sa clearing operation.
Wala hinuon matino ni Labella kung pabalikon ba ang mga sidewalk vendors sa downtown area.
Pinaagi sa night market, makabaligya ang mga vendors sa kadalanan inig alas-6 sa gabii ngadto na sa alas-4 sa kaadlawon.
Apan siguraduhon gayud sa mga mamaligya nga mahawan sila inig abot na sa buntag gumikan kay gisiguro man ni Labella nga cleared ang kadalanan sa Colon Street ug Osmeña Boulevard inig adlawan.
Samtang gitataw usab ni Cebu City Probe head Raquel Arce nga ang Office of the City Market Administration maoy modala sa night market ug ang mga barangay officials maoy mobantay sa seguridad ug sa kahapsay niini.
Sa laing bahin, giklaro ni Arce nga wala pa sila kadawat og pamahayag gikan sa Department of Interior and Local Government (DILG) mahitungod sa resulta sa ilang clearing operations sa nanglabay nga mga semana.
Matud niini nga posibleng mopadangat ang nahisgutang ahensya og komunikasyon ngadto sa mayor kalabot niini. (DN/FDP).
