CEBU – Lima ka mga nalambigit sa iligal nga drogas ang nasikop sa mga sakop sa PDEA 7 kauban ang Regional Intelligence Division (RID) 7 atol na sa anti-illegal drug operation sa Barangay Sambag 1, dakbayan sa Sugbo, kaganihang buntag.
Giila ang mga dinakpan nga sila si Violeta Morales Saita, 68 anyos kinsang bag-o lang usab nga nakabuhi gikan sa Cebu City Jail, ang tag-iya usab sa drug den; Freddie Olongon, 68-anyos katabang sa maong drug den; Robon Saita, Jonel Basarte Sotillo ug Reynaldo Baranggan, nga pulos hingkod ang panuigon.
Gisaysay ni IA1 Mario Portugal, Team Leader sa PDEA 7, nga nakadawat sila ug report gikan sa usa ka ‘concern citizen’ kalabot na sa drug den sa area, hinungdan nga gipaubos kini sa surveillance hangtud sa napahigayon ang malampuson nga operasyon.
Matud pa, basi sa ilahang gipahigayon nga surveillance, sagad sa musulod sa maong drug den ug mugamit ug iligal nga drogas kay mga trabahante ug mga PUJ drivers.
Nakuha gikan sa mga dinakpan ang 19 ka mga pakete sa shabu nga mikabat sa 11 gramos ug mikantidad ug P74,800.
