Personal nga mibisita ug nangayo og pasaylo si Department of the Interior and Local Government (DILG) Secretary Juanito Victor “Jonvic” Remulla sa lalaki nga gi-ticketan human naaktuhan nga nagsagol og semento nga wala magsul-ob og sinina sa Mandaluyong City.
Atol sa iyang pagbisita, giangkon mismo sa kalihim nga nasayop siya sa paghatag og direktiba alang sa estrikto nga pagpatuman sa mga lokal nga ordinansa ubos sa Safer Cities Initiative sa departamento.
Matud ni Remulla nga adunay mga konsiderasyon sa pagpatuman sa mga ordinansa sama sa paghatag og exemption sa mga nagtrabaho sa init o nabuwad sa init nga panahon samtang ang mga makit-ang naglatagaw o mogawas nga walay sinina lang ang mahimong ticketan.
Samtang, giuli usab sa kalihim ang P500 nga kantidad nga gibayad sa lalaki alang sa ticket nga iyang nadawat ug isip pagpakita sa iyang sinsero nga pagpangayo og pasaylo, gibayran usab ni Remulla ang gasto sa mga tiles nga kinahanglan ayohon sa pamilya sa lalaki.
