CEBU CITY-Gidala sa Cebu City Police Office si Simeon “Gabro” Gabutero gikan sa Labangon Police Station 10 kung asa kini gi-detinar sukad sa iyahang pagkasikop.
Nasayran nga gidawat ug kasamtangan nga gi-transcribe sa Cebu City Prosecutors’ Office ang extra judicial confession ni Gabutero kung diin iyang gi-angkon ang kalambigitan sa kamatayon ni Rhea Mae Tocmo, ang 19-anyos nga babae nga napalgang patay ug gisulod sa usa ka karton sa Brgy. Tisa ning Dakbayan sa nilabay nga Hulyo 17.
Usa sa lig-on nga ebidensya nga gihuptan sa mga kapulisan nga nagtumbok kang Gabutero isip suspek sa pagpatay ni Tocmo mao ang pag-positibo sa DNA sample niini nga gipaubos sa polygraph forensic testing sa mga kapulisan niadtong niaging semana.
Sa gikatakda nga press conference karung adlawa nga gipahigayon sa Cebu City Police Office sa pango niini nga si PCol. Ireneo Dalogdog ug Police Major Angelito Valleser nga mao ang hepe sa Labangon PNP, nasayran nga manag-uyab si Gabutero ug Tocmo sukad pa sa nilabay nga Disyembre 5, 2022 pinaagi sa Facebook apan nagkita ang duha sa unang higayon kaniadto lang nilabay nga July 16, nga mao ang adlaw usab sa pagpatay sa biktima.
Gi-angkon sa suspek nga napatay niya si Rhea Mae Tocmo pinaagi sa pagtuok sa alas 6 sa buntag sa Hulyo 16, 2023, adlaw’ng Domingo.
Samtang, kahiubos ang usa sa gilantaw nga motibo sa mga kapolisan sa pagpatay sa biktima gumikan sa gitaho sa suspek nga nasuko og nagselos kini tungod sa pag-chat sa biktima ngadto sa lain-laing mga lalaki tungod sa trabaho niini ug matod pa sa suspek nga nahiubos siya kay dako na sya og nagasto sa biktima pinaagi sa pagpadala og gcash apan giingon nga wala kini padulngan.
Sigon ni Valleser nga adunay kauban si Gabutero nga nagdala og nagbilin sa karton nga gisudlan sa biktima sa Mohon, Tisa apan dili pa maklaro ang dagway niini sa CCTV.
Pasakaan og kasong murder si Gabutero samtang ma konsiderar nga “case closed” ang naasoy nga kaso kung pormal na nga mapasakaan og kaso ang suspek.
Samtang, gibutyag usab ni Valleser nga gawas sa affidavit sa igsoon ug amahan sa biktima kay kompleto na ang ebidensya batok kang Gabutero.
