Prangka nga miingon si kanhi gobernador Ilocos Sur Luis “Chavit” Singson nga si Pres. Ferdinand Marcos Jr. ug ang kanhi House Speaker ug Leyte 1st District Rep. Martin Romualdez kay mao ang mga “mastermind” sa isyu sa korapsyon sa mga flood control projects sa Department of Public Works and Highways (DPWH).
Matud ni Singson nga ang kanhi Ako Bicol Party-List Representative nga si Elizaldy “Zaldy” Salcedo Co giingong gilakip aron ang koleksyon sa mga proyekto sa pagkontrol sa baha mas lapad ug mas organisado.
Gipresentar usab sa kanhi gobernador ang 14 ka mga kongresista nga giingong adunay bilyon-bilyong kantidad sa alokasyon.
Ang nanguna kanila giingong si House Majority Leader Sandro Marcos nga giingong adunay kapin sa P15 bilyon nga alokasyon sa mga flood control projects.
Mahitungod niana, ‘wala pa motubag ang Malacañang sa mga pasangil nga gibato ni Singson.
Samtang, nanawagan usab ang kanhi gobernador sa mga relihiyosong grupo nga maghiusa ug magprotesta bahin sa giingong mga anomaliya sa mga proyekto sa pagkontrol sa baha sa gobyerno.
Matod niya nga personal siyang makigkita sa nagkalain-laing relihiyosong organisasyon aron dasigon ang ilang panaghiusa sa panawagan nga kontrahon ang graft and corruption. Giawhag usab niya ang mga Pilipino nga moapil sa iyang gitawag nga “one-time, big-time” rally.
