Gidakop ang usa ka lalaki human nalunod ang usa ka speedboat duol sa Statue of Liberty sa New York, nga nakapatay sa usa ka inahan ug sa iyang lima ka bulan nga bata.
Matud sa kapulisan nga ang insidente nahitabo niadtong Sabado sa gabii duol sa Liberty Island. Dose ka tawo ang gikataho nga naluwas human sa insidente.
Ang mga biktima nailhan nga sila si Sara Sanchez, 27-anyos, ug ang iyang bata, nga si Antonella Garcia.
Samtang, ang suspek, si Manuel Hernandez, 46, gidakop ug nag-atubang og 13 ka ihap sa reckless endangerment.
Ang mga piskal sa federal miingon nga si Hernandez anaa na karon sa kustodiya sa federal samtang nagpadayon ang imbestigasyon.
Usa ka Italyanong restawran sa Manhattan nga kanunay adtoan sa bana ni Sanchez, si Andres Garcia, miingon nga naglunsad kini og online fundraiser aron matabangan ang pamilya.
