Sugdan na sa pagpalawm ang suba sa Barangay Tejero ning dakbayan sa Sugbo sugod karong umaabot Miyerkules, Septiyembre 3, 2025.
Mismong si Cebu City Mayor Nestor Archival ang mipahibalo sa maong lakang atol sa press conference niini kagahapong adlawa sa Lunes, Septiyembre 1, diin gisaysay niini nga adunay mga panimalay sa maong dapit ang nasulod sa 3-meter easement zone nga nasuta kaniadto sa Task Force Gubat sa Baha.
Gani mimando si Mayor Archival sa Division for the Welfare of the Urban Poor (DWUP) sa pagkuha sa dugang mga dokumento sa mga lumulupyo sa maong dapit aron matino kung pipila ka mga balay ug institusyon ang maapektuhan sa maong lakang.
Sumala pa nga adunay 40 ngadto sa 100 ka mga panimalay ang anaa sa kiliran sa suba nga angay i-relocate aron sa ilang kaluwasan.
Ingon man nga aduna nay gihatag ang Department of Public Works and Highways (DPWH) sa balor nga P140-milyones sa kagamhanang dakbayan aron ibayad sa mga apektadong indibidwal ug pamilya.
Matod pa ni Mayor Archival nga aduna pay P114-milyones ang nahabilin sa pundo nga gitagana na para pagpalit og luna para kabalhinan sa mga apektadong panimalay.
Sa pagkakaron, adunay nagpadayon nga negosasyon ang kagamhanang dakbayan ug mga tag-iya sa luna nga palitunon niini nga nahimutang sa Barangay Talamban aron malibkas na ang mga residente ug hugot nga mapatuman ang 3-meter easement zone.
