Gitaho sa Department of Tourism (DOT) nga andam na ang Pilipinas, partikular na ang Sugbo sa pag-host sa Association of Southeast Asian Nations (ASEAN) Tourism Forum 2026.
Matod pa ni Tourism Secretary Christina Garcia Frasco nga ang pag-host sa ASEAN Tourism Forum nagpasiugda nga ang nasud kay adunay katakos sa paghangop sa liboan ka mga delegado gikan sa gawas sa nasud ingon man ang pagplastar sa Sugbo isip regional hub sa turismo, pagbangon sa ekonomiya, ug kaandam sa world-class events.
Gikatakdan ang ASEAN Tourism Forum nga magtipon sa mga ministro sa turismo, senior officials, national tourism organizations, ug industry leaders gikan sa ASEAN member state kauban ang mga dialogue partners sa mga nasud nga Chna, Japan, South Korea, Australia, Russia, ug India.
Gilauman ang kapin 5,000 ka mga delegado gawas ka mga mga kauban niini sama sa ilang mga pamilya ug private-sector participants.
Sumala ni Sec. Frasco nga ang ilang preparasyon kay giisip nga whole-of-government approach kauban sa pakigtambayayong ug koordinasyon sa Cebu Provincial Government, local city governments sa Cebu City, Mandaue, ug Lapu-Lapu.
Gisaysay niini nga makabenepisyo ang kalihuka sa mga industriya sama sa hotels, transport providers, aviation, tourism workers ug uban pa nga mukatap ang ekonomikanhong kaayuhan sa sektor sa agricultura, retail, ug creative industries.
Ang ASEAN Tourism Forum kay kabahin sa mga kalihukan nga gipangulohan sa Pilipinas isip country host sa ASEAN chairmanship karong tuiga nga gidawat ni Presidente Ferdinand “Bongbong” Marcos Jr. gikan sa Malaysia sa nakalabayng 2025.
