CEBU – Giklaro sa LTFRB 7 nga wala mag-kuwang ang mga pangpubliko nga sakyanan sa Sugbo, sukwahi sa obserbasyon sa pipila ka mga pasahero.
Matud ni LTFRB 7 Regional Director Eduardo Montealto, Jr. nga ang dispatch system ang problema diin dugay makabalik ang mga sakyanan gumikan sa traffic ilabi na sa pick hours, ingon man nga wala gi-dispatch sa mga operators ang ilahang tanang unit.
Sigon pa, ilaha nang giawhag ang mga operator nga ipagawas ang tanan nilang unit ilabi na sa oras nga adunay daghang pasahero arun nga ma-accomodate ang tanan.
Gani, gitataw ni Montealto nga nag-isyu pa sila ug special permit sa ubang sakyanan arun lang nga makalahos sa tanang rota.
Samtang, susihon sa naasoy nga buhatan ang mga sakyanan nga sayong mo garahi ilabi na kadtong mga nagpatuman sa gihapon ug boundary system.
Gipahibalo sa opisyal nga aduna na sila’y gipadalhan niini ug showcause order diin alas 6 pa lang sa gabii, mo garahi na ug dili na mo byahe hinungdan adunay mga pasahero nga ma-stranded gumikan kay walay masakyan.
