Wala giaprobahan sa Senado ang hangyo ni Sen. Ronald “Bato” dela Rosa, nga gamiton sa iyang pamilya ang Senate Mansion sa Baguio City.
Kasayran nga si Sen. Bato misulat kang Senate Pres. Vicente “Tito” Sotto III nga naghangyo nga ang iyang pamilya magpabilin sa Senate Mansion alang sa CSAFP Cup shooting competition nga ipahigayon sa Marso 26-29, 2026.
Sumala sa sulat nga nadawat sa Office of the Senate Secretary sa samang adlaw, ang mansyon gamiton lamang alang sa pag-accommodate sa pamilya sa senador.
Wala gihisgutan sa sulat kung moapil ba usab si Dela Rosa sa nahisgutang kalihokan.
Bisan pa, si Senate Secretary Mark Llandro Mendoza miingon nga ang hangyo sa senador dili mahatag tungod kay ang Senate Mansion kasamtangang giayo.
Kahinumduman nga si Dela Rosa wala na motambong sa mga sesyon sa Senado sukad Nobyembre 2025, human sa mga taho nga ang International Criminal Court (ICC) nag-isyu og warrant of arrest may kalabotan sa kasong crimes against humanity batok kang kanhi Presidente Rodrigo Duterte.
Nagsilbi nga hepe sa kapulisan si Dela Rosa atol sa administrasyong Duterte, diin nailhan usab nga kauban sa kontrobersyal nga war on drugs nga miresulta sa kamatayon sa liboan ka mga gidudahang tiggamit og droga.
Tungod sa iyang padayon nga pag-absent, halos tanan niyang mga gilangkuban nga komitiba sa Senado kay nawala usab. Niadtong Pebrero, gipulihan siya ni Sen. Joel Villanueva isip sakop sa Senate Committee on Justice and Human Rights.
Sa samang buwan, gipulihan usab siya ni Sen. Robin Padilla sa Senate Blue Ribbon Committee. Tungod usab sa iyang padayon nga pagka-absenot, gipasakahan siya og reklamo sa ethics sa grupo sa civil society nga ‘Wag Kang KuCorrupt.’
