CEBU CITY-Makapanglantaw sa umento sa suholan ang mga regular ug casula nga mga empleyado sa Cebu City Hall atol sa first tranche sa wage hike nga mandato gikan sa Malacañan.
Malangkoban kini sa Supplemental Budget No. 3 nga gipasar sa Sangguniang Panlungsod sa kagamhanang dakbayan sa Sugbo nga kasamtangang gipaubos sa review sa Local Finance Committee (LFC).
Gipaabot nalang kini nga masumiter sa konseho aron sa deliberasyon sa umaabot nga mga semana.
Sa pakighinabi sa Bombo Newsteam kang Cebu City Councilor Noel Wenceslao, kinsa Chairman sa Committee on Budget and Finance diin gitataw niya nga ang maong usbaw sa suholan kay retroactive.
Dugang pa sa konsehal nga wala pa misumiter ang LFC sa gisugyot nga Supplemental Budget No. 3 aron sa hingpit nga pagpatuman sa balaod apan posibleng mahuman kini sa una o ikaduhang semana sa Oktubre.
Ang umento sa suholan nagsunod sa Executive Order No. 64, nga gipirmahan ni Presidente Marcos niadtong Agosto 2, nga nagtugot sa usbaw sa suweldo sa mga kawani sa gobyerno sa upat ka tranches hangtod sa tuig 2027.
